കൊറോണ മരുന്ന്

                                                       കൊറോണ മരുന്ന്                                                                                                             -----------------------       

 ഇന്നത്തെ വിഷയം കിട്ടാൻ ചാരുവിന് ബുദ്ധിമുട്ട് ഉണ്ടായില്ല. എങ്ങോട്ട് തിരിഞ്ഞാലും കൊറോണ വിശേഷം.  എന്നാൽ പിന്നെ താമസിക്കണ്ട എന്ന്  ചാരുവിൻ്റെ മീഡിയ സഹായി. തലേന്ന് തന്നെ ഒരുക്കി വച്ചിരുന്ന വസ്ത്രങ്ങളിൽ ചാരു ക്യാമറയ്ക്ക്ക്ക് മുന്നിലെത്തി.  വിഷയം ശോകമായതിനാലും തമാശകളിൽ തുടങ്ങാൻ സാധിക്കാത്തതിനാലും ഒരല്പം ഗൗരവത്തോടെ തന്നെ തുടങ്ങി.----- "കൂട്ടുകാരെ, കൊറോണയ്ക്കുള്ള മരുന്ന് പലതും നിങ്ങൾ പരീക്ഷിച്ചു കാണും. ഞാനും അങ്ങനെ തന്നെ. പച്ച മുളക് തൊട്ട് പച്ച ഇറച്ചി വരെ ചവച്ചരച്ച്  തിന്നാൻ പറയുന്നത് അനുസരിച്ച് മടുത്ത നാം ഇനി എന്ത് ചെയ്യും? മുഖാവരണം, സാമൂഹിക അകൽച്ച, എന്നിവ കാറ്റിൽ പറത്തി കൊണ്ട് നടക്കുന്നത് എതിരാളിയ്ക്ക് പിടി  മുറുക്കാൻ സഹായകമായി എന്ന സത്യം കണ്ടില്ല എന്ന് നടിക്കാൻ പറ്റില്ല.  ഭക്ത സംഘങ്ങൾ പ്രാർഥന കൊണ്ട് നടക്കുന്നുണ്ടെങ്കിലും വാക്സിൻ വേണം എന്ന് പറയുന്ന നല്ല കാഴ്ചകൾ ഭാവിയിലേയ്ക്ക് ഗുണം ചെയ്യും.  നാട് ശവ പറമ്പാവുന്ന കാഴ്ചകൾ കണ്ടില്ല എന്ന് നടിക്കരുത്.  ചിതയിലെ തീ വെളിച്ചമല്ല എന്ന തിരിച്ചറിവ് നല്ലതായിരിക്കും.  സഹോദരരുടെ കണ്ണീർ കാണാതിരിക്കുകയും ചെയ്യരുത്.  പാട്ടും ഡാൻസും എല്ലാം മനസ്സിന് സന്തോഷം നൽകുന്നതിനൊപ്പം യാഥാർത്ഥ്യത്തിൽ നിന്ന് ഒളിച്ചോടാനും സഹായിക്കുന്നു.  ഒരു പരിധി വരെ ഭക്തിയും ചെയ്യുന്നത് അത് തന്നെ.   ജനനവും മരണവും അനിവാര്യമായ ഒന്ന് തന്നെ.  എങ്കിലും മരണം ദുഃഖകരം . ജീവിക്കാനുള്ള ആഗ്രഹം എല്ലാവരിലും ഉണ്ടെങ്കിലും,  ആഗ്രഹം ഒന്ന് കൊണ്ട് മാത്രം നമുക്ക് മുന്നോട്ട് പോകാനാവില്ല.  പരസ്പര സഹായം അത്യാവശ്യമുള്ള ഈ സമയത്ത്  'ഞാൻ- നീ' എന്നീ വേർതിരിവ് തുടച്ചു നീക്കാൻ ശ്രമിക്കാം. ജീവനെ മുന്നോട്ട് കൊണ്ടു പോകാൻ സഹായിക്കാം.  ആഘോഷങ്ങൾ , കൂടെയുള്ളവരുടെ കരച്ചിൽ കേൾക്കാതിരിക്കാനുള്ള മറ ആവതിരിക്കട്ടെ. പ്രാണ വായു കിട്ടാനും കൊടുക്കാനും ഇല്ലാത്ത ഈ സമയത്ത്  കുറ്റപെടുത്തലുകൾ കൊണ്ടും അധികാര ദുർവിനിയോഗം കൊണ്ടും പരസ്പരം തോൽപ്പിക്കാതിരിക്കാം. ഒന്നാമനാവാനും വിജയം കൊയ്യാനുമുള്ള സൂത്രങ്ങളും, സമ്പത്ത് എത്തിക്കാനുള്ള യന്ത്രങ്ങളും സൂക്തങ്ങളും,  ദൈവ സംരക്ഷണത്തിനുള്ള  മന്ത്രങ്ങളും തന്ത്രങ്ങളും സഹായത്തിന് എത്തുന്നുണ്ടോ? ഉണ്ടെങ്കിൽ നമ്മുടെ അവസ്ഥ ഇത്രയും മോശമാകില്ലായിരുന്നു      സഹോദരർ പ്രാണ വായുവിന് വേണ്ടി പിടയുന്നതും കത്തിയെരിയുന്നതും കണ്ടില്ല എന്ന് നടിക്കാനും മനസ്സിന് സുഖം തോന്നുന്ന കാഴ്ചകൾ കാണാനും കേൾക്കാനും പറയുന്നത് അപകടകരമായ ഒരു നീക്കമാണ്.   മന്ത്രതന്ത്രങ്ങൾ ചൊല്ലി രക്ഷപ്പെടുന്നവർ ഉണ്ടെന്ന് തോന്നുന്നില്ല. എല്ലാ വിഭാഗവും കൊറോണ കുടക്കീഴിൽ വരുന്നുണ്ട്.  നാം സ്വീകരിക്കുന്ന ഉപദേശം ശാസ്ത്രീയ അടിസ്ഥാനം ഉള്ളാതാവണം എന്നു ഉറപ്പ് വരുത്തുക." ---  ചാരു മതിയാക്കി. ,   എണ്ണിയാൽ ഒടുങ്ങാത്ത സ്വർഗ്ഗീയ ദൈവങ്ങളും  ആൾ ദൈവങ്ങളും ഉള്ള നാട്ടിൽ എന്തു പറയാൻ? Like, comment, subscribe, follow എന്നീ വാക്കുകൾ പറഞ്ഞില്ല.                                                                                                     -----------------------------

അടുക്കളയിലെ കനലും തീയും

കുറെ ദിവസങ്ങളായി  അടുക്കള താരമായി വിലസുന്നു.  പിന്നാമ്പുറത്ത് നിന്നിരുന്നവൾ അരങ്ങ് തകർക്കുന്ന കാഴ്ച കണ്ട്   പലരും തങ്ങളുടെ അനുഭവത്തിൽ നിന്ന്  വിചാരണകൾ നടത്തുന്നു.   തങ്കു ഇതെല്ലാം കാണുകയും കേൾക്കുകയും ചെയ്തു, എഴുപതുകളുടെ തുടക്കം ആഘോഷിക്കുന്ന തങ്കു ഒരു പാട് അടുക്കളകൾ കണ്ടിട്ടുണ്ട്.  തങ്കുവിൻ്റെ വീട്ടിലെ അടുക്കളയിലെ ചമ്മന്തി പലകയായിരുന്നു അന്നു താരം, അതിലെ ഉണക്ക മുളകും കല്ലുപ്പും ചിലപ്പോൾ രണ്ടു തുള്ളി വെളിച്ചെണ്ണയും.   വേവിനെകുറിച്ചോ രസത്തെകുറിച്ചോ ആർക്കും ഒരു പരിഭവും ഉണ്ടാകാൻ ഇടയില്ലാത്തവിധം ഉപ്പും മുളകും ഒന്നാകും.  പിന്നെ പണിക്ക് പോകുന്ന വീടുകളിലെ അടുക്കളയെ കുറിച്ച് പറയുകയാണെങ്കിൽ  എല്ലാ ഭാവങ്ങളും രസങ്ങളും ആർത്തിയും ആർഭാടവും എല്ലാം ചേർന്നതു തന്നെയായിരുന്നു.  ഇപ്പോൾ അടുക്കള വീടുകളിൽ ഉണ്ടോ എന്ന് സംശയം തോന്നാറുണ്ട്.  ചെറുതും വലുതുമായ ഒരു പാട് അടുക്കളകൾ വഴിയോരത്ത് ഉണ്ടല്ലോ.   പൂമുഖത്തും ഊണ് മേശയിലും ഇരുന്ന്  ആഘോഷിച്ചിരുന്ന കൂട്ടരെ കാണാൻ ബുദ്ധിമുട്ടാണ് എന്നു തോന്നുന്നു.  ഇന്നലെ തന്നെയാണ് എന്ന് തോന്നുന്നു,  മാഷിൻ്റെ മരുമകനെ അടുക്കളയിൽ കണ്ടു, തീ കത്തിക്കാതെ തന്നെ കഴിക്കാനുള്ളതു തയ്യാറാക്കുന്നതു കണ്ട കാഴ്ച രസകരമായിരുന്നു.  തീയില്ലാത്ത, പുകയില്ലാത്ത, പെണ്ണില്ലാത്ത അടുക്കള.  വെറുതെയല്ല തങ്കു ഇനി പുറം പണി മാത്രം ചെയ്താൽ മതി  എന്നു മാഷിന്റെ മോളു പറഞ്ഞത്.  മാഷും ടീച്ചറും പോയതിൽ പിന്നെ മോളാണ് വീട്ടിൽ താമസം.  മോളെയും അധിക സമയം വീട്ടിൽ കാണാറില്ല. കുട്ടികളും ആയിട്ടില്ല . പറഞ്ഞു വന്ന അടുക്കള കാര്യം, അങ്ങനെ ഈ വീട്ടിലെ അടുക്കള ,ചായം തേച്ച് മുഖം മിനുക്കി. ഇപ്പൊ കുറെ നാളായി കുറെ ചെക്കന്മാർ സ്‌കൂട്ടറിൽ പൊതികളുമായി തലങ്ങും വിലങ്ങും പോകുന്നത് കാണാം. രവിയുടെ മോൻ പറഞ്ഞറിഞ്ഞു, നിറമുള്ള അടുക്കളകളിൽ നിന്നെത്തുന്ന നിറമുള്ള ഭക്ഷണം എത്തിക്കുന്നത് ഈ കുട്ടികളാണ് എന്ന്.  തങ്കുവിന് ഈ ഇടപാട് വളരെ ഇഷ്ടമായി. തിളച്ച എണ്ണ വീണു പൊള്ളാത്ത കൈകൾ,  രസം പോരാത്തതിനു ഊണു മേശയിൽ നിന്നു പറക്കാത്ത പാത്രങൾ , ചൂടു ചായ വീണു പൊള്ളാത്ത മുഖങളും മനസ്സൂം, മൊത്തത്തിൽ ഒരാഘോഷം.   കുറച്ചു കാലം ഇങനെ പോകട്ടെ, അപ്പോഴേയ്ക്കും അടുക്കള, പൂമുഖം പോലെ എല്ലവർക്കും ഇരിപ്പിടം ഒരുക്കിയിട്ടുണ്ടാകും.  ഇങനെയൊക്കെ ഒരു ഭാഗത്ത് നടക്കുന്നുണ്ടെങ്കിലും പാചകറാണിമാർക്ക് കുറവൊന്നും ഇല്ല എന്നാണറിഞ്ഞത്.  സമ്മാനവും കിരീടവും കിട്ടാത്ത കുറച്ചു പേർ ജീവിക്കാൻ വേണ്ടിയും വേറെ ചിലർ തൻ്റെ ജീവനായവർക്കു വേണ്ടിയും അടുക്കള അരങാക്കുന്നു.   തങ്കു ഇപ്പോൾ കാഴ്ചകൾക്കായി കണ്ണും മനസ്സുും തുറന്നു കൊടുത്തു. മാറി മാറി വരുന്ന നിറങൾക്കു എന്താ ഭംഗി.